قرض مستورة من بنك ناصر الاجتماعي

إسراء عبدالحافظ

“حالتنا المادية قبل القرض كانت صعبة والمصاريف بتكفينا بالعافية، لكن بعد القرض الحالة اتيسرت وربنا كرمها من وسع”

زيدان أحمد شعبان من ” محافظة الفيوم” وتحديدا قرية ” ديسيا” أب لأسرة مكونة من ٥ أفراد وعنده ٣ أطفال ١٢ سنة و ١٠ سنين وطفل سنة ونص يعني في مراحل تعليمية مختلفة مصاريفهم كتير وطبعا مفيش مصدر دخل يقدر يصرف بيه على ولاده ، تعالوا نعرف إزاي قدر في أقل من سنة إنه يرفع مستوى معيشته من خلال وزارة التضامن الإجتماعي.

بيحكي زيدان ويقول ” كنت بفكر في مشروع دواجن يدخل ليا عائد أقدر أصرف بيه على أهلي وأعيش منه وسمعت عن قرض مستورة من بنك ناصر الإجتماعي ، فقدمت على القرض وكانت الإجراءات سهلة جدا أخدوا صورة المدام وبياناتها عشان القرض باسمها وبياناتي كضامن ومضيت على إيصال الحصول على القرض وفعلا في خلال شهرين كان معايا القرض بقيمة ٢٠ ألف جنيه وبدأت مشروعي وجبت الكتاكيت وربيتها والناس بدأت تعرفني واتشهرت والمشروع كبر ونوعت في أنواع السلالات اللي بربيها عشان أغطي كل الطلبات، ودلوقتي ببيع قطاعي للزبون العادي وجملة بالكيلو للتجار ، وبالنسبة لسداد القرض بسدده على ٢٤ شهر وبدون فوائد، الحمد لله”.