قصيدة عن شهداء الوطن

 للشاعر و الكاتب/ محمد يوسف 

مات كام شهيد؟ 

أيه الجديد؟

لو مات شهيد، فيه الف غيره بيتولد 

ده شيئ أكيد 

نام يا شهيد

 أفرح و عيش في جنتك 

اليوم ده عيد 

نبكي و نصرخ من الفراق

وبإيه بفيد

هتقولوا عشنا بحسرته، و أهو راح بلاش

لا ده أحنا متنا من الأسى، و هو اللي عاش 

 ياما ناس كتير ماتوا في حياتنا، و مهمناش

بس النهاردة عريسنا طالع للسما بدر التمام 

زفة ملايكة مزهزهة لأجمل غلام

علي إيه بقي حسرة و آلام

يمكن زعلنا كان قلق 

على حلم عمره اللي أتسرق

على قلب أمه اللي أتحرق

لكن دموعنا بس حبر علي ورق 

و لا تسوي نقطة من دمه و حبة عرق

إزاي دموعنا تساوي أطهر ما خلق

وعلى أيه دموع بزيادة هم كفاية 

مبقاش رجوع و لا دي هتبقي نهاية

قيدوا الشموع و أقروا عليه كام آية 

و ادعوا بخشوع تعلا لمصر الراية 

ولسة المدنة مرفوعة بأدان منصور 

و لساه الصليب واقف و مش مكسور 

و لسه فيه أمل طالل في قلب النور 

و راح نزرع بيوتنا خضار و أرضكوا بور

و مهما تحاولوا يا أندال هتفضل مصر 

و حتى لو هدمتوا السور هيبقي القصر 

و نحلف مهما كان منكم هييجي النصر 

وهنصلي في كنايسنا صلاة العصر