حالتي لما تكون بعيد .. بقلم ميرفت أمين

حالتى لما تكون بعيد

زي طير مكسور جناحه

زي ليل معدوم صباحه

زى مجروح بين أطبا

محتارين في دوا لجراحه

ساكتة لكن سامعة صوتى

صوت حزين كاره سكوتى

وفي عيون الناس بعيش

والحقيقة أنا عايشة موتي

وسط ناس حوالية لكن..

حاسة قلبى ليه وحيد

حالتى لما تكون بعيد

في البعاد حبك هزمنى

ومحاوطني وملازمنى

سامعة كل حوار مابنا

مش بأيدي وغصب عنى

عارفة ان دي النهاية

والبعاد أفضل بداية

انما الحالة في بعدك

عاوزة قلب يكون حديد

حالتى لما تكون بعيد

كل يوم أشغل في وقتي

يمكن أقدر أداوي حالتي

فجأة أشوف نفسى فى حضنك

بينادينى يقول ليه غيبتى

وأما انام احلم بطيفك

واما أقوم أتمني أشوفك

قلبى بعد البعد عنك

حالف مايعيش يوم سعيد

حالتى لما تكون بعيد