حوار نور عبدالحليم عمر
رغم أن الموهبة مازالت في أولى خطواتها في الطريق، ورغم قصر المدة التي أخذت تُعير موهبتها الاهتمام إلا أن رسوماتها أظهرت تلك الإرادة التي سلكتها من أجل نيل إعجاب الجمهور وإرضاء النفس عن جمال اللوحة مع الخبرة الأولية ولكن حقًا فلوحاتها تُظهر عزيمة وإصرار فتاة عملت على ذاتها حتى بلغت ذلك المستوى المُرضي دعونا نتطرق إلى الحديث معها…
_ في البداية حدثينا عن نفسك؟
أماني رضا محفوظ، ٢٠سنه، من المنوفية قرية دنشواي.
_متى اكتشفتِ أنكِ تمتلكين موهبة الرسم؟
من سنه بالظبط يوم ٢٠/٣/٢٠٢٠ حسيت عاوزة أخرج من مشاكل كنت عديت بيها في حياتي وحبيت أثبت نفسي وحسيت إني مايلة للرسم وعلى طول بحلم أبقي فنانة.
_ ومتى وكيف بدأتِ ممارسة الموهبة؟
بدأت برسم شعر عادي وورد ورسم زي الأنمي رسم حاجات عادية جدا زي أي حد مبتدئ بس كان عندي شغف كبير أوي إن لازم أوصل لمستوى كويس جدا في أقل وقت، بدأت أرسم طول اليوم أوقات كنت بطبق في النوم عشان أخلص، واحدة واحدة وصلت لليڤل مُرضي ليا في سنة رسم.
_ رغم أنكِ تقولين أن مدة العمل على موهبتك هي سنة تقريبًا وهذه مدة قصيرة مقارنةً بباقي الموهوبين والفنانين في الرسم والذين تستغرق منهم سنوات إلا أن لوحاتك يبدو عليها إبداع ملحوظ ما السر في ذلك؟
شغفي وأحلامي دايما بيطوروني ويخلوني أبدع حقيقي في أي رسمة معايا والوقت اللي بديه للرسم أقل رسمه ٧-١٠ساعات بتديها التفاصيل واللمسات اللي الرسمة تستحقها ومش بستعجل أبدا أنها تخلص لكن أنا مش باخد راحة، أنا برسم متواصل ومش بسيب الرسمة إلا لما تنتهي والحمدلله النتيجة بترضيني.
_ ما الصعوبات والمشكلات التي واجهتك في البداية؟
أكتر حاجة صعبة لما تحبي حاجتين
يعني أنا بحب التمريض واختارته من البداية وحبيت الرسم واختارته والمجالين ملهمش أي علاقة ببعض فكان الموضوع صعب شوية في الأول على ما بدأت أفهم في الرسم، بدأت أظبط الدنيا وأشوف هوفق بينهم ازاي بحيث تقديري عن امتياز وأقفل معظم مواد التمريض مينزلش معايا والحمدلله قدرت أعدي المشكلة ده.
فيه بردو إن كنت داخلة عاوزة أثبت نفسي في وقت قصير وأنا معرفش أي حاجة عن الرسم وكل فنان تسمعيه ليه طريقة خاصة بيه فالتشتيت مكنتش بحبه لحد ما بدأت أفهم الأدوات واحدة واحدة وأقدر أختار وأطور من الأدوات وأجيب الأفضل والاسكيتشات الأفضل فيهم ومازالت
تالت صعوبة وتقريبا بتواجه كل شخص بيرسم إنه الرسم مش سهل زي ما الناس متصوراه غير الوقت اللي بناخده في بورتريه فيه وجع لجسمنا وخاصةً للي زيي اللي بيحب يكمل الرسمه ٩ : ١٠ ساعات متواصل.
_ طبقًا لاهتمامك بمجال دراستك وبموهبتك أيضًا ماذا لو استحوذ إحداهما على الآخر أي منهما ستتركين وأي منهما ستُبقيه في المركز الأول مهما كلفك الأمر من خسارة؟
الرسم موهبة ولو أنتِ موهوبة يبقى الموهبة مستمرة معاكي وفي أي وقت هتدربي وترجعي لمستواكي تاني، إنما تمريض مش هينفع أسيبه خاصةً إن فيه عمل إنساني وحاجة بينك وبين واحد أنتِ بتنقذيه وبتاخدي عليه ثواب عظيم من الله ونفس الوقت مش هسيب الرسم خالص لو اخترت تمريض بالعكس لو في الأسبوع رسمة واحدة فده كويس بس زي ما قدرت أكمل الرسم والتمريض سنة وكانت صعبة إلى حدٍ ما إن شاءلله مافيش حاجة هتخليني أختار بينهم.
_ هل في بعض الأوقات بيلهمك مجال دراستك أفكار أو موضوعات تتطرقين لرسمها؟ وهل يؤثر بكِ المرضى ومعاناتهم فتلجأين إلى إخراج إحساسك بهم في هيئة رسومات أم أنه غير ذلك؟
أيوة أكيد زي فيروس كورونا بعمل زي حملات توعية بالرسم ورسومات عبارة عن لبس الماسك وغسيل الأيدى والتباعد وخاصةً إن فيه أطفال كتير بيتعلمو الرسم على صفحتي فا رسمة زي ده بتوعيهم وتفيدهم.
_ ده شيء عظيم جدًا إن الموهبة بتساهم في التوعية والإفادة، هل هُناك أجواء مُعينة تصنعيها بذاتك لتهيئين طقوسًا مناسبة للرسم؟
أيوة بفضل إن المكان يبقي هادي أشغل يا ميوزك يا قرآن أبقي بعيد عن أي ضغط أو إزعاج.
_ أيّ نوعٍ من الرسم تفضلين؟ وأيّ نوعٍ ترسميه؟
بفضل البورتريه رسم أشخاص وبرسم بيه أكتر رسمي هو بورتريهات
وأحب أشتغل بالألوان بحس إنها بتديني حقيقة الشخص وواقعيته أكتر.
_ كأي رسام تعلم البورتريه متى بدأتِ أوردرات بعد التعلم وتنمية الموهبة ؟
صحابي بقو يطلبو أوردرات وكنت بقنعهم إن لسه مبتدئة بس كانت حاجة حلوة عشان أحس إن لازم أطور أكتر والحمدلله ده حصل.
بدأت أوردرات تقريبا بعد تلت شهور من بدايتي كنت أيوة قدرت أطلع الشخص تمام بلمسات حلوة والأحسن إنها بتعجبهم وبتبقى عجباني وكل ما أعمل أوردر أحلى ببقى مش عاوزة أسلمه، بس كنت ببقى حابه يبقى موجود عشان كده كنت بحاول أركز وأطلع معظم الأوردرات حلوة وتعجب صاحبها أكتر ما تعجبني.
_ هل هناك نوعًا آخر من الرسم تمارسيه؟
هو رسم البورتريهات اللي بدأت أركز عليه رسمت في الأول طبيعة وصحراء وبحر بس مكنش عندي شغف أكمل فيها.
_ ماهو السبب في انعدام الشغف تجاه هذا النوع من الرسم ؟
إن ببقى حابة أهادي ناس كتير منهم فنانين فكان ده سبب قوي إني أسيب رسم الطبيعة وأرسم أشخاص
وكنت عاوزة أبقى معروفة ومعظم الناس تتكلم عن رسمي بالحلو أو الوحش كل واحد بيبقى ليه رأي بس المهم يوصل لناس كتير، والحمدلله رسمت فنانين وشجعوني ودعموني ولو بحب حد أوي أحب إن أعبرله عن حبي برسمه ليه.
_ من هم الأشخاص والفنانين الذين قمتي برسمهم ؟
• منهم أصغر مؤذن في الحرم ومُقلد أصوات القرآن لجميع الشيخ والأذان محمود فضل ومن أكتر الشخصيات المحترمة اللي ممكن أقابلها وذوق جدًا.
• أستاذة منى الشاذلي.
• الشهيد المنسي وزوجته شكرتني على رسمتي ليه وعجبتها جدًا.
• الكينج محمد منير.
• والباشمذيع محمد عبدالقادر.
• وأخر رسمة كانت للفنان مهند حسني.
_ هل رسمك لتلك الشخصيات وإعجابهم باللوحات زاد من شعور الثقة والحب للرسم بداخلك؟
أوي أوي كل ما أرسم رسمة ويشوفوها ويشجعوني أبقى فرحانة جدا وأرسم تاني وباخد ثقة أوي وبيخليني أصمم إن لازم أطور أحسن وأحسن ويستضفوني في برامج أكتر.
_ كيف تتم استضافتك في البرامج؟
بواسطة شاعر مُبدع جدا ليه علاقة بالإعداد كنت راسمه ليه صورة لأن بحب طريقة إلقاءه للشعر وعجبته الصورة فقالي هكلم الإعداد وفعلا بعدها لقيته بيقولي على ميعاد أول لقاء شباب على الهوا وتاني لقاء بعدها وكان الأحب بالنسبالي في برنامج سكر هانم.
_ مين هم أكثر داعمي “أماني محفوظ” في مشوارها خلال تلك الفترة ؟
أول ناس دعموني هما أهلي وزوج أختي وخطيب أختي دعموني بالكلام وأنهم يشجعوني برأيهم والأكتر فيهم كان يشجعني كل يوم عن التاني أخويا وكان يقولي براڤو كملي وهتوصلي حقيقي كانو دعم ليا مع إنهم كانو مختلفين في البداية بسبب إن الرسم والتمريض مجالين مختلفين وخاصة إن مكنتش برسم أي رسمه حتى أوضحلهم إن هنجح بس بعد ماشافو رسم ليا شجعوني
وبعد كده صحابي وأكتر واحدة إيمان كشك صاحبتي أكتر دعم كل ما أرسم خطوة أبعتلها وتقولي الإختلاف كنت مصدعاها معايا ومازلت.
• وبعد كده قريتي قرية دنشواي بقوا ياخدو رسمي شير ويدعموني كانت أجمل حاجة فرحت بيها أوي اللي هما أهل بلدك جنبك وبيشجعوكي وهتوصلي كانت حاجة مميزه وحلوة
ومدرسيني والمدرسات اللي كانت بتديني ودكاتره كتير بتدرسني لما عرفو إني برسم كلموني وفرحانين جدا بمستوايا وكل ده بيديني ثقة.
_ من هم أكثر الفنانين الذين تتابيعيهم؟ ومن هم الفنانين الشباب الذين يُعجبك رسمهم؟
• فنان لبناني المهندس محمد حمادي من أجمل وأرقى الشخصيات اللي عرفتها هو اللي علمني الرسم والأساسيات وإزاي هرسم وكان بيشرف على رسمي ويبعتلي فيديوهات شرح ليه ونتنافس في الرسم، كل الشكر ليه يعني ولسه لدلوقتي مستمر وبإذن الله يعلمني خامة الزيت.
• فنانين تركيين وأجانب.
• وفي مصر كريم عادل وأسامة فتحي من أكتر الأشخاص اللي تعلمت منهم بردو.
• ومن أكتر الناس اللي بتعجبني
رسوماتهم حلو أوى: أحمد جيدو، خالد الصيداوي، محمد مجدي، محمد مدحت، آية مجدي، ياسر نصر، محمد الجمصي، محمود بن هشام، أمنية نور الدين، بهاء علي، وكتير جدا بصراحة رسمهم حلو أوي.
ومن أجمل الناس اللي بدقق أوي في رسمهم محمد شعبان، آية عامر، ساره حسنين، مرهف المصري رسمهم فوق الروعة.
_ ما الأدوات التي تستخدميها في الرسم؟ وما الأدوات التي تنصحين بها المبتدئين؟
كل خامة ليها أدواتها الخاصة هكلمك عن الرصاص بستخدم b2.b4.b8.b10 وقلم ميكانيكي وأستيكة فحم، وأستيكة عاديه وبراية واقلام تسييح أو ودنات قطن واسكيتش كانسون وأنصح بيهم أي مبتدئ.
التاني مستوى الفحم قلم فحم اللي بستخدمه ماريس سوفت، قلم بلاك، وفرش ميكب ناعمة، أي نوع للتسييح أستيكة فحم، بورده فحم ماريس، استيكه مانو كهربا عاديه بس رفيعه عادي بس عشان التفاصيل، قلم جل للاضاءات.
أما المستوى الثالث الألوان بستخدم فيه ألوان فابر كاستل ٢٤ لون مش غاليه خالص للمبتدئين بردو لو هيرسمو ألوان.
_ هل رسمتِ لوحات ثم تم تمزيقها أثناء رسمها أو بعد الانتهاء منها ؟ وهل السبب في ذلك عدم رضاءك عنها أم الأخرين؟
ايوة كتير أوي رسومات قطعتها، اللي حواليا راضيين عنها بس أنا لا مفيهاش الشبه الكامل اللي أنا عاوزاه عشان كدا بسيبها جنبي أرسم الصورة تاني وبعد ما أخلصها بقطع الرسمة الأولى.
_ هل يعد الرسم بالنسبة لكِ تحررًا أم هو سجنًا داخل اللوحة؟
الرسم تحرر من كل المشاكل اللي في حياتك وإنك تفرغي تفكيرك في الرسمة اللي في إيدك ده إحساس جميل أوي عمره ما هيبقى سجن داخل اللوحة حتى لو استغرقت في الرسمه الواحد ٢٠ ساعة ودي بتحصل كتير.
_ في إطار المواهب والفن لو لم تكوني رسّامة ماذا تكوني؟
الحياة من غير رسم صعبة فالحمدلله على دي نعمة وموهبة، أما لو مكنش ربنا عطاها ليا فكنت هبقى مصممة أزياء، بحب التفصيل من صغري بس مجربتش أتعلمه بسبب الدراسة والرسم فلو مكنش فيه رسم أكيد كنت هفتح مشروع وأفصل ملابس وأتعلم من ناس كتير.
_ وأخيرًا وليس آخرًا بم تنصحي الشباب المبتدئ في مجال الرسم ؟
متيأسوش الموضوع في الأول صعب جدًا حقيقي وأنا عارفة كل ده بس كل حاجة صعبة نهايتها حلوة ومميزة ونجاح وشهرة وكل حاجة في الحياة صعبه فلازم لو عندك الموهبة متدفنهاش بيأسك، غيرك بيتمناها شجع نفسك خلي عندك الشغف اللي يقودك لتحقيق كل اللي بتتمناه وتسعى ليه هتلاقي احباطات أنا أخدتها كتير أوي وناس هيقولو عليك رسمك وحش ولما تتميز برسمك هيقولو ده مش رسمك بس أوك وفين المشكلة المهم الثقة بالنفس إن كل حاجة مش بتدوم على وضعها وهتتقدم ويبقى ليا كارير مميز.
More Stories
المهندسة منال شفيق سليمان… عقل هندسي استثنائي يقود مشروعات التأمين الصحي في جنوب الصعيد ويصنع بصمة لا تُمحى
علياء سليمان حسن محمد سفيرة الجمال اليدوي وملكة التفاصيل
منار أحمد عبد الكريم — تمكين المرأة في الإعلام… رؤية جديدة تعيد تشكيل المشهد العربي